O Presidente electo da República Oriental do Uruguai, José «Pepe» Mujica, foi sempre un exemplo de dignidade e constancia para os que, desde sempre, tiveron na súa traxectoria un referente moral para as loitas de liberación sudamericana. Nas eleccións do domingo no Uruguai, foi elixido o respectado dirixente Pepe Mujica, un home loitador de toda a vida, respectado en Uruguai, no sur do continente. Mújica vén da loita armada e foi, desde sempre, un claro defensor dos movementos políticos  de esquerdas. Parafraseando a Chávez, a Patria Grande americana engrandece ao contar a Pepe entre os seus Presidentes, home necesario no horizonte axexado polo goriletismo hondureño ou o uribismo colombiano fronte ao cal Pepe Mújica  é o máis firme símbolo vivente de indoblegábel resistencia.

Esta histórica e consecutiva vitoria da esquerda  permite ratificar que o obxectivo uruguaio seguirá sendo a transformación social en positivo da sociedade, a igualdade e a xustiza social, e consolida a pervivencia do aire limpo, da dignidade e soberanía que atravesa o sub – continente americano de xeito irreversible.

Realizáronse unhas eleccións transparentes nas que resultou vitorioso o pobo.
Isto é, usando  palabras de Vicente Rangel, un contraste, un proceso lucido e digno fronte á sórdida conxura dos golpistas, dos aventureiros empresarios da rapina, da oligarquía apoiada polo departamento de Estado e polo goberno imperialista ianqui.