Este domingo 29 de novembro  produciuse  unha farsa electoral en Honduras, iniciándose dese xeito a segunda etapa dun golpe de estado promovido polo Imperio. En palabras do presidente venezolano, Hugo Chávez, a nova técnica do imperio, o golpe “legal”. Nada que ver co proceso real e verdadeiramente democrático que, tamén este domingo, protagonizou o pobo do Uruguai,  onde os primeiros resultados a pé de urna dan como gañador nas eleccións presidenciais ao candidato de esquerdas da Fronte Ampla (FA), José “Pepe” Mujica con 51,2 por cento dos votos, mentres que o seu principal contrincante, Jorge Alberto Lacalle, obtería o 44, 9 por cento, segundo reportou o enviado especial de teleSUR, Edgardo Esteban.

Os comicios convocados polo réxime  de facto hondureño, cinco meses despois do golpe de estado, experimentaron este domingo unha baixa afluencia de votantes (a abstención real está ao redor do 70 – 75 por cento), cun despregamento militar sen precedentes que foi acompañado de represión contra os que se opoñen pacificamente contra os fraudulentos comicios.

O réxime golpista pretende lexitimar a asonada oligárquico – militar a través das eleccións convocadas con amaño, nunha perigosa manobra que senta un mal precedente na rexión. Tal é así que  Varios países latinoamericanos con gobernos de esquerdas , entre eles Venezuela, Brasil, Arxentina, Ecuador, Paraguai, Bolivia e Nicaragua, anunciaron o seu descoñecemento ao proceso ilegal.

“América Latina ten experiencias dabondo de golpistas que usurparon o poder rompendo os principios democráticos, e se aceptamos iso, pode ocorrer o mesmo noutro país mañá”, dixo o presidente brasileiro, Luiz Inácio Lula dá Silva.

Para o xefe de Estado ecuatoriano, Rafael Correa, o feito de que na rexión teñan lugar en pleno século XXI golpes de estado do xeito máis salvaxe, similares aos de hai tres ou catro décadas, é moi perigoso e preocupante.

Como poden celebrarse eleccións democráticas cos militares na rúa, nun país asediado? preguntouse o mandatario de Venezuela, Hugo Chávez, e afirmou que os países latinoamericanos libres non recoñecerán eses comicios.

 “…É necesario aumentar a cruzada contra a fraude en Honduras  para que os crimes e as xogadas políticas da ditadura que encabeza Roberto Micheletti, co apoio explícito dos Estados Unidos, non queden impune…”, expresou o vicepresidente de Parlamento Latinoamericano (Parlatino) e secretario de relacións internacionais do Partido Comunista de Venezuela (PCV), Carolus Wimmer, ao falar da situación actual en Honduras.

 A Fronte Nacional contra o golpe de estado en Honduras, que agrupa a unha vasta gama de organizacións populares, denunciou este domingo en rolda de prensa unha serie de feitos violentos dos que foi vítima o pobo hondureño por parte do goberno de facto e chamou á cidadanía a non participar e permanecer nas súas casas desde as 06:00 ata as 18:00 hora local.

“É un toque de queda popular en protesta pola fraude montada polos golpistas”, dixo Rafael Alegría, un dos líderes da valente resistencia civil ao golpe de estado. Outra voceira da fronte detallou a cifra de ameazas e violacións dos que foron obxecto, así como das capturas dos grupos afectos a esta organización e sectores que se opón ao golpe de Estados.

“O pobo está rexeitando esta ditadura con moita forza, o pobo non quere violencia, por iso vemos que nas urnas hai un absentismo superior a 50%, pois este domingo as urnas non son para o pobo senón para a ditadura”, subliñou o deposto presidente constitucional, Mel Zelaya. Horas despois, ao coñecerse que as actas daban unha abstención de ao redor do75%, Zelaya consideraba necesario que se anulasen as eleccións por falla de lexitimidade dos comicios.

Moitos xornalistas puideron constatar que moitos centros de votación estaban case baleiros e que nalgúns só se atopaban as persoas designadas para traballar nas mesas de votación.

Marlon Escoto, reitor da Universidade Agrícola de Catacama, sinalou que, sen loxística, os militares tentaron trasladar urnas electorais, podéndose realizar a fraude electoral pola vía do teléfono móbil, xa que as persoas que estean nas mesas, poden enviar o cálculo total dos votos, até un 30 por cento, sen importar que os demais votos non sexan tomados en conta. É dicir, que se produza unha manipulación informativa dos datos. Mais, cos datos das actas xa lles resultaría aos militares moi difícil tentar variar os datos da abstención nas urnas, cando menos facelos creibles.

Varios medios de comunicación alternativos informaron que 800 estadounidenses, tratando de pasarse por hondureños, estarían participando na organización dos  comicios hondureños. Os centros de votación estaban custodiados por 30 mil policías e militares profesionais, ademais de cinco mil “reservistas” que ninguén coñecía xunto aos  800 “expertos” estadounidenses. Até grupos paramilitares, equipados con modernos aparellos de represión, foron despregados en todo o territorio hondureño con motivo das votacións.

Até o momento só Israel, Estados Unidos e os seus portavións terrestres no Sur, Costa Rica, Colombia e Perú manifestaron a súa disposición a validar as eleccións.

 
“As eleccións xerais nun Estado de facto, sen que previamente se restaure a democracia e o Estado de Dereito, son unha aberración xurídica, unha burla e un engano ao pobo”, advertiu o presidente constitucional Manuel Zelaya.
Baixo estas condicións, os hondureños foron  chamados onte domingo a acudir ás urnas para elixir a un presidente, tres vicepresidentes, 128 deputados, 298 alcaldes e vice – alcaldes e dous mil concelleiros municipais.