Apunta o xornal  “El país” que o sociolingüista Anxo Lorenzo ( relacionado a sectores do PSdeG) será o encargado da política lingüística no Goberno de Alberto Núñez Feijóo. O PPdG xa encontrou  o seu exterminador  ideal  do idioma galego. Non é de Galicia Bilingüe e pode dar unha imaxe pública de moderado. Excelente anxo exterminador.

 Coincidimos moitos que  primeiro paso que  dará o PP será derrogar o decreto do galego no ensino, impoñendo o castelán en forma de “consenso”:

 temos a maioría absoluta, polo tanto podemos matar o galego, afogalo ou marxinalo,  eliminando  as probas obrigatorias de galego para o acceso ao funcionariado ou lexitimar un cambio da Lei de Normalización Lingüística que permita oficializar a forma castelá do topónimo das cidades galegas. Estamos, dese xeito, dispostos a consensuar a forma de exterminio.

  Como dixo Bieito Lobeira, o obxectivo último do PP é aniquilar a lingua galega non noso país e acabar cos sinais de identidade do pobo galego. Falou moi claro Lobeira cando subliñaba que «nunca un goberno da Xunta chegara a tal extremo de tentar volver a unha toponimia que impuxo o franquismo e instaurar nomes como Sanjenjo ou Cillero».

É difícil de entender  que calquera  especialista minimamente comprometido co galego acepte  o cargo de Secretario Xeral de Política Lingüística nun goberno ultraconservador saturado de dirixentes tardofranquistas e que pretenden levar a nosa cultura á absoluta marxinalidade. Como apuntan dende A Mesa, «A partir de hoxe o posto de verdugo xa non está vacante, mais o caso é que se trata dun posto de verdugo. Pode ser máis guapo ou máis feo, ter máis currículo ou menos currículo, máis ou menos capacidade para embaucar, mais é un posto de verdugo para o galego».

Como dixemos moitas persoas moitas veces, non podemos permitirnos enterrar o galego nin outro retroceso letal para a lingua que nos une como galegas e galegos. O 17 de maio todo@s a Compostela!