Iniciouse a exposición pública do expediente expropiatorio dos terreos afectados polo parque industrial de Lendo (a maior parte xa foran adquiridos inicialmente polo acordo cos propietarios). En total son 41 as parcelas afectadas e suman unha totalidade de 118.548 metros cadrados. O expediente estará a exposición pública durante un mes, e pode consultarse tanto nas oficinas de “Suelo Empresarial del Atlántico (S.E.A.)” en Compostela, como no propio concello da Laracha. A finais do ano pasado foran adxudicadas as obras de urbanización do Parque Empresarial da Laracha.

Esta nova emitiuna o BNG da Laracha nun comunicado no que amosa a súa satisfacción polo feito de que este Parque Empresarial (un dos principais da provincia) vaia ser axiña unha realidade  para acadar un necesario desenvolvemento sustentábel da Laracha, e polo tanto a creación de emprego e a fixación de poboación.

Débese lembrar que a adxudicación provisional do contrato de urbanización e conexións exteriores das obras do parque industrial da Laracha foi encomendada  á empresa “Fomento de Construcciones y Contratas”, por un importe de 9.600.197,40 euros, e o contrato de dirección de obra  á empresa “Proyfe S.L.” por un importe de 297.865 euros.

Considera o Grupo Municipal do BNG que é  unha boa noticia da que todos os grupos políticos e todas as veciñas e veciños do concello da Laracha se deben alegrar. Mais considera tamén que deben ter toda a información, e que se debe recoñecer  o labor do goberno bipartito que agora rematou o seu mandato, e en concreto da Consellería de Vivenda e Solo, a artífice principal de que o Parque Empresarial Público da Laracha poida ser unha realidade, e non un decrépito polígono privado como pretendía o PP.