Rusia celebra hoxe 12 de abril o Día Mundial da Cosmonáutica. Transcorreron exactamente 48 anos desde que o home viu por vez primeira o seu planeta desde o espazo extraterrestre. O 12 de abril de 1961, ás 9 horas e 7 minutos de Moscova, a nave Vostok, con Yuri Gagarin a bordo, despegaba desde o cosmódromo de Baikonur (hoxe esa base pertence a República de Kazajstán, onde tamén se celebrou esa festa). Precisamente desde ese cosmódromo despegan hoxe en día as naves espaciais de 300 toneladas de peso. Para que semellante mole supere a gravidade terrestre necesítanse propulsores de 20 millóns de cabalos de forza.

108 minutos durou o primeiro voo de “Yuri Gagarin” ao espazo. Durante ese tempo a nave deu unha volta ao noso planeta e horas despois xa estaba na Terra e saudaba a todos os soviéticos como o seu heroe. A moitos bebés nacidos nese mesmo día puxéronlles de nome “Yuri”. O líder soviético Nikita Jruschov fíxolle entrega  na Praza Vermella da Estrela de Ouro de Heroe da Unión Soviética e adxudicoulle o título de Piloto-cosmonauta da URSS.

Iso xa é historia e desde entón os voos espaciais volvéronse regulares. Despegan aparellos rusos, europeos, chineses e norteamericanos. Pero todos celebran a festa da cosmonáutica precisamente o 12 de abril, día do primeiro voo do home ao espazo. Na Rusia actual, despois da desmembración da URSS en repúblicas independentes, segue cumpríndose o programa na Estación Espacial Internacional. Actualmente trátase de aumentar o número de tripulantes. Noutros anos lanzábanse cara á estación dúas naves pilotadas, agora envíanse catro. Na estación traballarán 6 persoas.

Agora terminou o concurso para a creación dunha nova nave espacial e dun novo lanzador, e foi gañado pola compañía rusa Enerxía. Estase creando o novo cosmódromo Vostochni, desde onde partirán novos foguetes. Estase ultimando a creación do sistema GLONASS, e estanse deseñando novos equipos de navegación.

Entre os logros do último ano figuran o proxecto COROAS-FOTON para o estudo da coroa do Sol e un explorador non pilotado que proximamente partirá cara a Fobos, un dos satélites de Marte. Ademais, en Moscova iniciouse un experimento de 105 días no marco do proxecto científico ruso coa axencia europea ESA “Marte-500”. Seis voluntarios de Rusia, Alemaña e Francia pasarán todo ese tempo en condicións moi semellantes ás dun voo real ao planeta vermello.

Visita a galería de fotos da axencia Ria-Novosti:

http://sp.rian.ru/photolents/20090412/120980670.html