Ataques mediáticos ás Normas do Hábitat, ás Galescolas, ao Consorcio Galego de Igualdade e Benestar, ao concurso eólico, á nova política industrial e de comercio, ao Banco de Terras, ás políticas de desenvolvemento da Consellaría do Medio Rural, á Cultura Galega, aos Planos Sectoriais de Vivenda, ás oposicións ao consorcio, aos mitins nos que participe algún alto cargo nacionalista… non queda ninguén  do sector nacionalista do Goberno ou Parlamento Galego que non recibise de «La Voz de Galicia» acusacións sen fundamento e malintencionadas,  que semellan obedecer a unha estratexia desesperada por querer deturpar o labor realizado polos profesionais cualificados e políticos  que demostraron a súa valía ao servizo da Administración Pública Galega e dos cidadáns. Os ataques de «La Voz de Galicia» non responden en nengún caso á realidade dos feitos e constitúen un claro exemplo de manipulación informativa e de vulneración de todos os principios da ética xornalística. E porque o fan?

Semella que o PP e La Voz (do seu dono) saben que as enquisas coinciden en que pode haber unha reedición do bipartito. Tamén parecen saber que  os resultados electorais  van depender da abstención, e que unha participación do 64 ou o 65 por cento favorecería ao PP, podendo acadar estes, dese xeito, a maioría absoluta. Vexo na falta de rigorosidade de todo o publicado nese xornal, contra o sector nacionalista do goberno,  un suxo obxectivo ou  pretensión de confundir á opinión pública e provocar o desánimo nas persoas, militantes, simpatizantes e votantes do BNG, na etapa máis intensa da campaña electoral. A base electoral nacionalista  semella un obxectivo a bater dese medio de (in)comunicación para cadrar os resultados electorais ao seu gusto. Aparecía un comentario  dunha persoa, lectora dun xornal electrónico, relativo ao comportamento de «La Voz de Galicia» no que se amosaba  a realidade da actuación partidaria, de fondo xogo sucio  dese periódico:   “ultimamente a La Voz de Galicia véselle por onde vai descaradamente, só hai que ver como ataca ao BNG, desde que foi o concurso eólico. Non sei que intereses terían no mesmo, pero a min La Voz de Galicia paréceme cada vez mais patética e partidista”.

Recomendo unha visita  ao artigo que aparece nas Terras de Pondal sobre a deturpación mediática que realiza La Voz (de su amo) do mitin de Quintana en  Oia.